“Allah heç kimə onun gücünün çatdığından artıq yük yükləməz”. (Bəqərə, 2/286)

Allah Təala insanlara dinin əmr etdiyi məsələlərdə heç bir çətinlik yükləməyib. O, belə buyurur:

“Allah sizi çətinliyə salmaq istəmir, lakin O, sizi arındırmaq (pak və təmiz etmək) və sizə verdiyi nemətini tamamlamaq istəyir. Beləcə bəlkə, şükr edəsiniz”. (Maidə, 5/6)

“(Allah) sizə  din barəsində heç bir çətinlik yükləməyib”. (Həcc, 22/78)

“Kora babal yoxdur, topala babal yoxdur, xəstəyə də babal yoxdur (onlara günah gəlməz)”. (Fəth, 48/17)

Namazını ayaq üstə qıla bilməyənlərlə əlaqədar olaraq belə bir hədis var:

İmran ibn Husayndan rəvayət edilir: Məndə hemoroid (babasil) xəstəliyi var idi. Peyğəmbərimizdən soruşdum ki, belə bir vəziyyətdə namazı necə qılım? O, mənə cavab olaraq: “Namazı ayaq üstə qıl. Əgər buna gücün çatmasa, oturub qıl. Buna da gücün çatmasa, böyür üstə uzanıb qıl”¹ – dedi.

Siz ancaq əlinizdən gələn və görə bildiyiniz işlərə görə cavabdehsiniz. Namazınızı bacardığınız qədər oturub qılın. Gücünüz buna da çatmasa, hədisdə bildirildiyi kimi uzanıb qılın.

Saytımızın materiallarından istifadə edərkən mənbə göstərilməlidir. Müsəlmanlar © 2004 Bütün hüquqları qorunur.

1. Buxari, Təqsirus-Səlat, 19; Əbu Davud, Səlat, 174