Müselmanlar » Qumar

Pay verilən lotereyanı nə etmək lazımdır?

teoloji — Tue, 27 Dec 2011 15:36:16 +0000

Cavab: Allah təmizdir (pak), təmiz olanı qəbul edir. Qumar oynamaq isə haramdır. Lotereya da həm hazırkı qanunlara (baxın: ticarət hüququ) əsasən, həm də dində qumar hesab olunur. Lotereyanı mövcud qanunlara əsasən ancaq dövlətin müəyyən etdiyi şərtlər daxilində oynamaq mümkündür.

Bir daha deyək ki, lotereya oynamaq qumardır. Qumar oynamaq haramdır. Haramdan əldə olunan gəlirlə xeyriyyə işi görmək olmaz. Əgər sizə hədiyyə kimi lotereya bileti verilibsə, onu cırıb atın. Bu, görəcəyiniz ən yaxşı işdir.

Suala cavab verdi: Professor Abdulaziz Bayındır

QEYD: Bu sual saytımıza Türkiyədən daxil olub.

Həftəlik və ya aylıq qızıl günü keçirmək olar?

teoloji — Fri, 30 Sep 2011 06:35:23 +0000

Cavab: Qızıl günü keçirməyin (xalq arasında buna lotereya oynamaq da deyilir) və püşk atmaqla növbə müəyyən etməyin bir eybi yoxdur. Çünki bu yığıncaqlarda bir qadının verdiyi və götürdüyü qızılların sayı eynidir. Deməli, bu məsələdə hansısa bir qumar və faiz motivi yoxdur.

Uduş məqsədilə oyun oynamaq qumardır?

teoloji — Thu, 29 Sep 2011 01:33:23 +0000

Cavab: İştirak edənlərin ortaya müəyyən miqdarda pul və yaxud bir şey qoyub axırda qalib gələnin ona yiyələnməsi ilə nəticələnən hər növ oyun (adı nə olursa olsun) qumardır. Deməli, haramdır.

Əgər üçüncü bir şəxs (tərəf) ortaya müəyyən qədər pul və ya bir şey qoysa və qalib gələn tərəf onu alsa, bunda bir problem olmaz. Yəni, bu, halaldır.

İdman yarışlarında pulu adətən o yarışlara (bilet almaqla) tamaşa etməyə gələnlər verirlər. Qələbə qazanan komanda və ya qalib gələn bir idmançı o pulun hamısını və ya böyük bir hissəsini ala bilər. Bunda da bir problem yoxdur.

Suala cavab verdi: Servet Bayındır (İstanbul Universitetinin dosenti, Türkiyə).

Aşağıdakı sual və cavablarla tanış olun:

http://www.muselmanlar.com/fitvalar/qumar

http://www.muselmanlar.com/fitvalar/oyunlar

Bukmeker şirkətlərinin nöqsanlarından istifadə edib pul qazanmaq olar?

teoloji — Sat, 25 Jun 2011 21:03:17 +0000

Cavab: Bukmeker şirkətlərinin oynatdıqları oyunlar qəti surətdə qumardır. Bunda heç bir şübhə ola bilməz. Qumar da böyük günahlardan biridir. Başqa sözlə desək, bir müsəlmanın bəxt oyunları oynamağı qətiyyən düzgün deyil. Bu, məsələnin birinci hissəsidir. Ətraflı məlumat üçün aşağıdakı keçidə daxil olun:

http://www.muselmanlar.com/fitvalar/qumar

İndi isə sualınızın ikinci hissəsinə gələk. Siz bildirirsiniz ki, bukmeker şirkətlərinin sistemində necə deyərlər, açıq bir qapı “kəşf” etmisiniz. Elə isə siz də yaxşı bilirsiniz ki, bu yolla pul qazanmaq qeyri-qanunidir. Oynanan oyunun qumar olmağı o demək deyil ki, siz kiminsə pulunu oğurlayasınız.

Bir müsəlmanın: “İşki satırlar”, – deyə, bir barı, “Zina edirlər”, – deyə, bir ümumxananı (fahişəxana) qarət etməyi düzgün deyil. Dində belə şeylərə icazə yoxdur! Eynilə bunun kimi, qumar oynadırlar deyə, bukmeker şirkətlərinin hesablarını talan etmək də düz deyil. Bu, açıq-aydın bir oğurluqdur. Oğurluq etmək də qumar kimi böyük günahlardan biridir.

Elə isə siz bu yola heç girməyin. Bu işə əsla təşəbbüs etməyin. Bundan uzaq durun.

QEYD: Bu sual saytımıza Türkiyədən daxil olub.

Lotereya oynamaq olar, yoxsa yox?

teoloji — Fri, 25 Feb 2011 07:57:52 +0000

Cavab: Lotereya oynamaq qumardır. Qumar Allah tərəfindən qadağan olunub. Bir sözlə, haramdır. Allah bundan uzaq durmağı əmr edir:

“Ey iman gətirənlər! Şübhəsiz ki, içki də, qumar da, (tapınmaq məqsədilə) dik qoyulmuş daşlar da, fal oxları da şeytan əməlindən olan murdar şeylərdir. Bunlardan çəkinin ki, bəlkə nicat tapasınız.

Həqiqətən, şeytan içki və qumar vasitəsilə sizin aranıza ədavət və kin salmaq, sizi Allahı yad etməkdən və namazdan ayırmaq istəyər. Siz (buna) son qoyacaqsınızmı?”. (Maidə, 5/90-91)

Lotereyada minlərlə, yüz minlərlə, hətta bəzi ölkələrdə milyonlarla insan bu işə pul qoyur. Nəticədə isə bir neçə nəfər udur.

Bəzi firmaların alıcılarına hədiyyə verməyində dini cəhətdən bir problem yoxdur. Çünki bu, hədiyyədir.

Lakin bəzi telekanallar təxminən belə bir məzmunda elanlar verir: “Hörmətli tamaşaçılar, filan nömrəyə sms (mesaj) yollayın, biz də sizi filan verilişimizə dəvət edək. Həmin verilişdə filan tiraj oynanacaq, beləcə, sizin də filan hədiyyələri qazanmaq şansınız olacaq”. Bu da qumardır. Çünki insanlar buna pul qoyur və nəsə qazanmaq məqsədi güdürlər. Telekanallar bildirdikləri nömrəyə göndərilən hər smsdən pul qazanırlar.

Bu məsələ ilə əlaqədar olaraq aşağıdakı yazıları da oxuyun:

http://www.muselmanlar.com/fitvalar/756.html

http://www.muselmanlar.com/fitvalar/1746.html

QEYD: Bu sual saytımıza Türkiyədən daxil olub.

Borcları ödəmək üçün şans oyunları oynamaq olar?

teoloji — Sat, 13 Mar 2010 07:33:47 +0000

Cavab: Bəxt oyunları haramdır. Borclarınızı ödəmək üçün haram əməllərə üz tutmamalısınız. Allah Təala Qurani-Kərimin İnşirah surəsində belə deyir:

“Hər çətinliyin yanında bir asanlıq (rahatlıq) var.

Bəli, hər çətinliyin yanında şübhəsiz ki, bir asanlıq da var.

Bir işi qurtardığın vaxt başqa bir işə qurşan.

Nə gözləsən, ancaq Rəbbindən gözlə”. (İnşirah, 94/5-8)

Bu ayələrə əsasən həmişə işləməli, çalışıb vuruşmalı, bir işi qurtardıqda başqa bir işə başlamalı və ancaq və ancaq Allaha arxalanmalıyıq. Əgər biz bu buyuruqlara tabe olsaq, Allah da bizim işimizi asanlaşdırar. Allah Özü bu barədə müjdə verib.

Qısa desək, qətiyyən haram əməllərə üz tutmayın. Səbrli olun və çox işləyin. Bununla yanaşı, bu çətin vəziyyəti asanlaşdırmağı üçün Allaha dua edin.

Bir qəzet öz oxucularını kupon və püşkatma ilə Ömrə ziyarətinə apara bilər?

teoloji — Mon, 08 Mar 2010 08:51:34 +0000

Cavab: Əgər oxucu o kuponlar üçün əlavə bir şey ödəmirsə, yəni, sadəcə olaraq qəzet pulunu ödəyirsə, bu məsələdə bir problem qalmır. Ömrəyə gedən 100 nəfərin püşkatma yolu ilə müəyyən edilməsi bu işi bəxt (şans) oyunları halına gətirmək demək deyil. Amma əgər qəzet pulundan əlavə bir məbləğ ödəmək tələb olunursa, o halda bu iş qumar hesab edilir.

Həvəsləndirmə kampaniyaları, lotereya biletləri və qumar

teoloji — Tue, 04 Aug 2009 07:43:02 +0000

Cavab: Lotereya qumardır. İslam dini baxımından qumar oynamaq haram olduğuna görə lotereya vərəqəsi almaq qumar oyununda iştirak etmək deməkdir. Lotereya bileti həvəsləndirmə məqsədilə verilsə belə, bu, nəticəni dəyişdirmir. Belə ki, o biletə malik olan şəxs yenə də qumar oynamış hesab olunur. Bir müsəlmana hədiyyə və ya həvəsləndirmə kimi içki və yaxud donuz əti verildikdə günaha batmamaq üçün onları məhv etməli olduğu kimi həvəsləndirmə üçün verilən lotereya biletini də cırıb məhv etmək lazımdır.

Qeyd: Sual soruşan şəxs Türkiyədəki benzindoldurma və ticarət mərkəzlərini nəzərdə tutub. Lakin bu qəbildən olan həvəsləndirmə və müştəri yığma kampaniyaları digər ölkələrdə də həyata keçirilir.

Qumar məqsədi güdmədən oyun oynamaq

teoloji — Tue, 04 Aug 2009 07:37:22 +0000

Cavab: Dostlar arasında sadəcə olaraq vaxt keçirmək üçün və ortaya pul qoyulmadan oynanan nərd və domino kimi oyunlar haram deyil, məkruhdur. Amma asudə vaxtları daha faydalı işlərlə qiymətləndirmək lazımdır. Bu məsələdə yüz ölçüb bir biçmək lazımdır. Çünki peyğəmbərimiz (s. a. v.) insanların boş vaxtlarını qiymətləndirmək məsələsində yanıldıqlarını bildirib.

İslam dinində bəxt oyunlarına necə baxılır?

teoloji — Tue, 04 Aug 2009 07:33:23 +0000

Cavab: Nəticəsinin nə və necə olacağı məlum olmayan bir şeyə aludə olub mal-mülkü asanlıqla əldən vermək, yaxud da bu yolla zəhmət çəkmədən və heç bir əmək sərf etmədən pul qazanmaq haramdır. Kart, domino, nərd və bunlara oxşar oyunlar vasitəsilə qumar oynayan insanlar axırda kimin udacağı naməlum olan bir oyuna aludə olaraq pul qoyur və ya bu formada zəhmət çəkmədən pul qazanırlar. Eyni şeyi toto və lotereya haqqında da demək olar. Yəni, vəziyyət bunlarda da eynidir. Bu oyunlarda iştirak etmək üçün verilən pulların bir hissəsi oyunu idarə edən müəssisə tərəfindən götürülür. Məbləğin yerdə qalan hissəsi isə iştirakçılar arasında tiraj keçirilməsi nəticəsində uduş qazanan bir neçə nəfərə və ya totoda olduğu kimi təxminən doğru çıxan bir neçə iştirakçıya verilir.

Cahiliyyə dövründə bütpərəst Ərəblər arasında da indiki lotereyaya oxşayan bir qumar oyunu var idi. Onlar bununla fəxr edirdilər. Məsələn, bir dəvəni kəsib 28 paya bölürdülər. Oyunda iştirak edənlər dəvənin pulunu verirdilər. Onların arasında uduş üçün oyun keçirilirdi. Üçü boş, yeddisi dolu olmaqla on ədəd oxları olurdu. Həmin oxları bir kisəyə doldururdular və mötəbər bir şəxs oyunun hər bir iştirakçısının adına püşk atırdı. Oxu boş çıxanlar dəvədən pay ala bilmirdilər. Dolu çıxanlar isə öz paylarını kasıblara verirdilər. İslam dini bunu qumar saymış və qadağan etmişdir.

Xeyriyyə cəmiyyətləri və ya humanist məqsədlər adı altında olsa belə, qumar və lotereyaya icazə vermək mümkün deyil. Bu, rəqs, balet və çılpaq manekenlərin moda nümayişi mərasimi ilə yığılan yardımlara oxşayır. Belə ki, burada məqsəd gözəl olsa da, istifadə olunan vasitə düzgün deyil. Pis bir şeyin qarşısını almaq dinimiz tərəfindən yaxşı bir şeyə sahib olmaqdan üstün hesab edilib. Bu qayda İslam hüququnda dəfi-məfasid cəlbi-mənafidən övladır (pis bir şeyin qarşısını almaq mənfəət əldə etməkdən əvvəl gəlir) prinsipiylə ifadə olunmuşdur.

Beləliklə, toto, lotereya, lotto və sairə kimi oyunlara icazə vermək dinimiz baxımından mümkün deyil.