Müselmanlar » Oruc

Oruc nədir?

teoloji — Mon, 05 Apr 2010 13:21:11 +0000

Cavab: Oruc imsak vaxtından iftar vaxtına qədər ibadət niyyəti ilə bir şey yeməmək, içməmək və cinsi əlaqəyə girməməkdir.

Ətraflı məlumat üçün aşağıdakı keçidə daxil olun:

http://www.muselmanlar.com/xususi-kateqoriyalar/ramazan/871.html

Niyyət etmək nə deməkdir?

teoloji — Mon, 05 Apr 2010 13:25:18 +0000

Niyyət etmək daxilən bir şeyə qərar vermək, bir işi nə üçün gördüyünü qətiyyətlə bilmək deməkdir.

Dini baxımdan isə niyyət etmək bir işi Allahın əmrinə tabe olmaq və ona yaxınlıq qazanmaq üçün yerinə yetirmək qərarından ibarətdir. İbadətlərdə (namaz qılmaq, oruc tutmaq və sairə kimi) mütləq niyyət edilməlidir, başqa sözlə ibadət edildiyi vaxt o ibadətə niyyət etmək lazımdır.

Ramazan ayında kimlər oruc tutmalıdırlar?

teoloji — Tue, 06 Apr 2010 10:49:36 +0000

Cavab: Ağıllı (əqli qüsuru olmayan, ağlı başında olan) və həddi-buluğa çatmış hər bir müsəlmana Ramazan ayında oruc tutmaq vacibdir. Yəni, oruc bu xüsusiyyətləri daşıyanlara yerinə yetirilməyi vacib olan bir ibadətdir.

Ramazan ayı neçə gündür?

teoloji — Wed, 04 Aug 2010 08:23:38 +0000

Cavab: Qəməri aylar bəzən 29, bəzən də 30 gün çəkir. Bu ayların nə vaxt başlayıb qurtardığı məsələsi aparılan müşahidələrlə müəyyənləşdirilir. Cari qəməri ayın 29-cu günü günəş batdıqdan sonra ertəsi gün ayın hilalı müşahidə edilir. Bu təzə hilal günəşin batmasından bir müddət sonra batdığına görə onu diqqətlə müşahidə etmək lazımdır. Qərb üfüqündə toz, tüstü, duman, bulud, sis və ya tutqunluq olduğu vaxt müşahidə aparmaq çox çətin, hətta qeyri-mümkün olur. Hilal görülmədiyi təqdirdə cari ay 30 günə tamamlanır. Artıq 30-cu gün axşam vaxtı hilalı müşahidə etməyə ehtiyac qalmır. O gün günəşin qürub etməsi ilə ikinci ay başlayır. Çünki heç bir qəməri ay 30 gündən artıq olmur.

Peyğəmbərimiz Muhəmməd əleyhissəlam bu məsələ ilə əlaqədar belə buyurub:

“Ramazan hilalını görəndə oruc tutmağa başlayın, Şəvval hilalını görəndə isə oruc tutmağa son verin. Əgər bulud ucbatından hilalı müşahidə etmək mümkün olmasa, Şaban ayını 30 günə tamamlayın”.

Başqa bir hədis isə belədir:

“Biz ümmi bir millətik. Yazmağı və hesabı bilmirik. Ay (barmaqları ilə göstərərək) belə, elə, belədir. (Əbu Davud dedi ki, ravi) Süleyman üçüncü işarədə bir barmağını qatladı. Yəni, ay 29 və ya 30 gündür”.

Ramazan ayından 1-2 gün qabaq oruc tutmaq lazımdır?

teoloji — Wed, 07 Apr 2010 07:14:36 +0000

Cavab: Əbu Hureyrədən (r. a.) rəvayət olunur ki, peyğəmbər (s. a. v.) belə buyurub:

“Ramazan ayını bir və ya iki gün əvvəldən orucla qarşılamayın. Ancaq bir şəxsin vərdiş halına gətirdiyi oruc o günə təsadüf edirsə, həmin orucunu tutsun”.

Bu hədisi əsas götürən Ömər ibn Xəttab, Əli ibn Əbi Talib, Əmmar, Huzeyfə, İbn Məsud kimi əshabələr və Səid ibn Müseyyəb, Şəbi, Nəhayi, Həsən Bəsri kimi tabelər və İmam Şafii Şaban ayının axırıncı 10 günündə oruc tutmağı caiz hesab etməyibər. Digər alimlər isə həmin günlərdə oruc tutmağı məkruh hesab edirlər.

Ramazan orucuna nə vaxt və necə niyyət etmək lazımdır?

teoloji — Tue, 06 Apr 2010 10:40:38 +0000

Cavab: Ramazan orucuna iftar vaxtından ertəsi gün günorta namazının vaxtına təqribən 5-10 dəqiqə qalana qədər niyyət etmək olar. Bu müddət ərzində insan daxilən Allah rizası üçün oruc tutmağa qərar verirsə, oruca niyyət etmiş də olur. Səhur yeməyi üçün yuxudan durmaq da niyyət hesab edilir.

Ramazan üçün hansı ölkəni əsas götürmək lazımdır?

teoloji — Tue, 06 Apr 2010 08:00:24 +0000

Cavab: Əgər siz öz yaşadığınız ölkədə Şaban ayının 29-cu günü hilalı (aypara) görsəniz, ertəsi gün Ramazan ayının başladığını başa düşüb oruc tutmalısınız. Amma əgər hilalı görməsəniz, hesab etməlisiniz ki, Şaban ayı 30 gündən ibarətdir. Ramazana da bundan sonra başlamalısınız. Eynilə bunun kimi Ramazan ayının 29-cu günü hilalı görsəniz, başa düşərsiniz ki, ertəsi gün bayram günüdür, o gün oruc tutmazsınız. Əgər hilalı görməsəniz, Ramazan ayının 30 gündən ibarət olduğunu qəbul edib bir gün də oruc tutmalı və sonra bayramı qeyd etməlisiniz.

Türkiyədə tətbiq olunan təqvim bu məsələyə dair ən düzgün təqvimdir. Bu təqvimin düzgünlüyü rəsədxana müşahidələri ilə də təsdiq olunur. Eyni zamanda bütün dünyada Ramazan və bayram vaxtlarında birliyin təmin olunması üçün təşkil olunan beynəlxalq komissiya tərəfindən hazırlanıb. Sizin bu təqvimə əsaslanmağınız düzdür.

Oruc tutduqda bəxt oyunu oynamaq olar?

teoloji — Wed, 27 Jul 2011 12:28:26 +0000

Cavab: İslamda bəxt oyunları oynamaq haramdır. Çünki hamısı qumardır. Amma bu oyunları oynamaq orucu pozmur.

Muhəmməd peyğəmbərdən (s. a. v.) belə bir hədis rəvayət edilir:

“Oruc tutan elə insanlar var ki, onların qazancları təkcə ac-susuz qalmaqdır”. (İbn Macə, Siyam, 21)

Oruc tutub Allahın əmrini yerinə yetirən insan Onun qəti surətdə qadağan etdiyi şeylərdən də uzaq durmalıdır.

Sualınızla əlaqədar olaraq aşağıdakı yazını da oxuyun:

http://www.muselmanlar.com/fitvalar/751.html

Saqqız çeynəmək orucu pozur?

teoloji — Tue, 26 Jul 2011 14:25:56 +0000

Cavab: Məşhur İslam alimi Ömər Nasuhi Bilmənin böyük islam elmihalı adlı əsərində bu məsələ ilə əlaqədar olaraq belə deyilir:

“Oruclu bir insanın əvvəlcə çeynənmiş ağ rəngli və parçalanmayan bir saqqızı çeynəməyi məkruhdur. Amma təzə (heç çeynənməmiş) bir saqqızı çeynəmək caiz deyil (olmaz)”.

Bu fikir bizcə də düzdür. Çünki oruc imsak vaxtından axşam günəş batana qədər ibadət niyyəti ilə yemək-içmək və cinsi əlaqədən uzaq durmaq deməkdir.

Quranda belə deyilir:

“Orucluq gecəsi qadınlarınızla yaxınlıq etmək sizə halal edildi. Onlar sizin üçün bir libas, siz də onlar üçün bir libassınız. Allah bilir ki, siz öz nəfsinizin tələbinə dözə bilmirsiniz (orucluq gecələrində zövcələrinizlə yaxınlıq edirsiniz). Elə buna görə də O, tövbənizi qəbul etdi. İndi onlarla birləşə bilərsiniz. Allah sizin üçün nə yazıbsa, onu axtarın. Şəfəqin qara cizgisi ağ cizgisindən sizcə tam seçilənə qədər yeyib-için. Sonra orucunuzu axşama qədər tamamlayın. Məscidlərdə etikaf (ibadət) halında olduğunuz zaman onlara yaxınlaşmayın. Bunlar Allahın qoyduğu hədlərdir; o hədləri aşmayın! Allah ayələrini (hökmlərini) insanlara belə izah edir ki, bəlkə, onlar müttəqi olsunlar”. (Bəqərə, 2/187)

Yuxarıdakı ayəyə əsasən yemək-içmək və cinsi əlaqədə olmaq orucu pozur (batil edir, sındırır). Ayənin axırında deyilir ki, bunlar Allahın hədləridir, onları aşmayın.

Elə isə o hədlərə aparan, onlara yaxınlaşdıran işləri də görməmək lazımdır. Yəni, insan oruc tutuğu vaxt yemək-içmək və cinsi əlaqəyə aparan hər növ işdən uzaq durmalıdır.

Saqqız çeynədikdə onun bir hissəsi insanın boğazına qaça bilər. Başqa cür desək, saqqızın udulmaq ehtimalı var. Ona görə oruc vaxtı saqqız çeynəməmək lazımdır.

Ramazan ayında gecələr ər-arvad münasibətinə icazə var?

teoloji — Tue, 26 Jul 2011 13:42:53 +0000

Cavab: Cinsi əlaqədə olmaq Ramazan ayında oruclu olduqda, yəni, imsak vaxtından iftar vaxtına qədər qadağandır. İftardan sonra isə imsak vaxtına qədər (qadın aybaşı halında deyilsə) ər-arvadın cinsi əlaqədə olmağı azaddır. Bunu bildirən Quran ayəsi aşağıdakı kimidir:

Buna oxşar qısa bir sual-cavabla tanış olmaq üçün aşağıdakı keçidə baxın:

http://www.muselmanlar.com/fitvalar/2493.html