Müselmanlar » İncəsənət

Teatrda müxtəlif cildlərə girmək günahdır?

teoloji — Fri, 15 Jan 2010 08:26:35 +0000

Cavab: Bəzi hədislərdə xəbərdarlıq edilir ki, qadınlar kişilərə, kişilər də qadınlara oxşamasın. Lakin bunlar həyat tərzi ilə əlaqədar şeylərdir. Yəni, qadınların eynilə kişilər kimi geyinib onlar kimi hərəkət etməyə çalışması, ya da kişilərin qadınlar kimi geyinib onlar kimi rəftar etməsi kimi şeylərdir.

Qeyd edək ki, zarafat, əyləncə, şənlik, teatr və sairə kimi oyunlarda müşahidə olunan şeylər bu qadağana daxil deyil. Bunlar mübah əyləncələrdir. Başqa sözlə, belə şeylər günah deyil.

Quranda şer yazmaq və şairlər barədə nə deyilir?

teoloji — Mon, 31 Aug 2009 09:52:08 +0000

Cavab: İslam dini İslama və əxlaqa zidd olmayan müsbət mahiyyətli şeri bəyənmiş və buna həvəsləndirmişdir. Peyğəmbərimiz Muhəmməd (s. a. v.) bu barədə belə buyurub:

“Şerin bir hissəsi hikmətdir”.

Buna əlavə olaraq başda Buxari olmaqla bir çox hədis kitabında belə bildirilir ki, peyğəmbərimiz şəxsən özü şer demiş, Həsən bin Sabit və Amir bin Əl-Əqva kimi bəzi şair əshabələrinə də bu məsələdə icazə vermiş və həmin şerlərə özü də qulaq asmışdır.

Amma şer neqativ bir xüsusiyyət daşıdığı vaxt zərərli hesab olunub və pislənib. İnsanları pis yola aparan şerlə əlaqədar olaraq Quranın Şüəra (Şairlər) surəsində belə deyilir:

“O şairlərə gəlincə, onların dalınca ancaq azğınlar gedərlər. Görmürsənmi, onlar hər sahədə həddi aşıb gedirlər. Həm də görməyəcəkləri işi dillərinə gətirirlər (deyirlər)”. (Şüəra, 26/224-226)

Amma İslama və əxlaqa zidd şer deməyən ya da yazmayan şairlər istisna təşkil edirlər:

“Ancaq iman gətirən, yaxşılıq edən, Allahı tez-tez zikr edən və haqsızlığa məruz qalanda intiqam alan şairlər belə deyillər. Haqsızlıq edənlər necə yıxılacaqlarını görəcəklər (hansı dönüşlə döndəriləcəklərini, aqibətlərinin necə olacağını) mütləq biləcəklər”. (Şüəra, 26/227)

Rəqsə münasibət

teoloji — Mon, 31 Aug 2009 09:48:26 +0000

Cavab: Allah insanı imtahan etmək üçün dünyaya göndərib. Bu imtahanın məqsədi kimin daha yaxşı bəndə olduğunu müəyyən etməkdir. Və imtahanın nəticələrinə əsasən müvəffəq olanlar mükafata layiq görüləcəklər, keçə bilməyənlər isə cəzalandırılacaqlar.

İmtahan üçün növbənöv vasitələr var. Bunların biri də Allahın qoyduğu qadağalardır. Dinlə əlaqədar terminologiyada həmin qadağalara haram deyilir. Müsəlman bir insan öz həyatında Allahı nəzərə alan insan olduğuna görə Onun qoyduğu haramlardan uzaq durur. Müsəlman insan sanki Allah yox imiş kimi hərəkət edə bilməz. Hər şeyi verən Allah əmr də verir, qadağa da qoyur.

Bu haramlardan biri də bir-birinə yad olan qız və oğlanın təkbaşına qalmağı, əl-ələ tutuşmağı və cinsi əlaqədə olmağıdır. Bir-birinə kəbin düşən iki ayrı cinsin nümayəndələrinin nikahsız olmaqla bu cür hərəkətlərə yol verməsi düzgün deyil.

Cinsi əlaqə və şəhvət hissi yaşanmasa da, haqqında danışdığınız kimi bir qadınla rəqs etməyiniz dini cəhətdən düzgün deyil. İctimai inkişaf anlayışınızı bu baxımdan dəyişdirməlisiniz. Bir müsəlman sosial inkişaf üçün Allahın haram etdiyi hərəkətlərə yol verə bilməz. Necə ki, bu məqsədlə içki içmir və qumar oynamırsınız, eyni formada sizə dini cəhətdən yad olan qadınlarla rəqs də etməməlisiniz.

Amma tək başınıza rəqs edə bilərsiniz. Bunda bir problem yoxdur.