Müselmanlar » Heyvanlar

Evdə it saxlamaq günahdır?

teoloji — Thu, 03 Mar 2011 14:21:56 +0000

Cavab: Evin içində it saxlamaq olmaz. Amma balkonda ayrı bir küncdə ola bilər. Bu da çox çətindir. Heyvana da əziyyətdir, insanlara da.

İt evin içində gəzməməlidir, bu halda evi biabır hala sala bilər.

Mənbələrdə belə bir əhvalat rəvayət olunur:

Bir gün Cəbrail əleyhissəlam həzrəti Muhəmməd (s. a. v.) evdə oturduğu halda, otağa girmir. Peyğəmbərimiz ondan nə üçün girmədiyini soruşur. O da deyir ki, içəridə bir küçük var. Baxıb görürlər ki, həqiqətən də, otaqda bir küçük var. Onu bayıra çıxardırlar. Bundan sonra Cəbrail əleyhissəlam otağa daxil olur. (Baxın: Müslim, Libas, 81 (2104).)

Bu kimi hədislərə görə evdə it saxlamaq müsəlman dünyasında yaxşı qarşılanmır, yəni, caiz hesab olunmur.

Ov etmək (tazı, tula) və mühafizə məqsədi ilə – çoban iti, xüsusi təlim keçmiş polis itləri, sərhəd-keçid məntəqələrində aparılan yoxlamalar üçün və oxşar məqsədlərlə it saxlamaq isə başqa bir məsələdir. Bunlara icazə var.

Heyvansevər bir insan it saxlamaq yerinə, pişik saxlaya bilər. Heyvan saxlamağın da bir sıra şərtləri var. Heyvan saxlamaq insan üçün əyləncəyə, heyvan üçün də işgəncəyə çevrilməməlidir.

Pişik və it alıb satmaq olar?

teoloji — Tue, 27 Apr 2010 14:40:52 +0000

Cavab: Dörd məzhəbin dördü də pişik alverinin caiz olduğunu qəbul edir. Onların bu barədə fikri müsbətdir.

Amma it alverini qadağan edən bəzi hədislər var.

Bu hədisləri əsas tutan Şafii və Hənbəli məzhəbləri it satmağı düzgün hesab etmirlər.

Maliki məzhəbi isə Nəsainin külliyatındakı bir hədisə əsaslanaraq ancaq ov itləri (tazı) və qarovulçu itlərinin satılmağını caiz hesab edir.

“Alınıb satılmağı caiz hesab olunan həmin itlərin cərgəsinə indiki dövrdə cinayətkarların tutulması, narkotik maddələrin axtarılıb tapılması, iz axtarmaq və bu kimi məqsədlər üçün istifadə edilən itlər də daxildir”.

Hənəfi məzhəbinin bu məsələ ilə əlaqədar fikri belədir:

“İt elə bir heyvandır ki, ondan istifadə etmək, fayda götürmək olur. İt satmağı qadağan edən hədis İslamın ilk dövrlərinə aiddir. Bu hədis sonrakı dövrdə aradan qaldırılıb. Beləliklə, hər növ itin satışı caizdir”.

Heyvanları cütləşdirmək olar?

teoloji — Fri, 22 Jan 2010 13:25:58 +0000

Evliliklə əlaqədar müəyyən qadağalar var və bunlar ancaq insanlar üçündür.

Heyvanların cütləşdirilməsi məsələsində belə bir şey yoxdur.

Ev heyvanlarını qısırlaşdırmaq olar?

teoloji — Tue, 07 Jul 2009 02:59:01 +0000

Cavab: Əgər bunun heyvanlara heç bir faydası yoxdursa, əksinə, zərəri varsa, onları qısırlaşdırmaq olmaz. Lakin evdə saxlanan pişik və digər heyvanlar məsələsində vəziyyət başqa cürdür. Bu cür heyvanlar saxlandıqları mühitin xaricindəki heyvanlarla bir araya gəldikləri vaxt müxtəlif xəstəliklərə tutulur və bu xəstəliklərin ucbatından çox yaşamırlar. Amma belə bir fikir var ki, bu məsələnin qısırlaşdırma əməliyyatı kimi həll yolları həmin heyvanlara zərərdən çox xeyir verir. Hətta belə deyilir ki, bu, onların ömrünü uzadır. Belə çıxır ki, bur cür heyvanları onlara gələn zərərdən uzalaşdırmaq və fayda vermək prinsipinə əsasən qısırlaşdırma əməliyyatı aparmaq caiz olmalıdır.

İnsana ziyan vuran heyvanları öldürmək lazımdır?

teoloji — Tue, 07 Jul 2009 02:56:17 +0000

Cavab: Əgər bir heyvan insana həqiqətən də, zərər verib xəsarət yetirəcəksə, insan bu təhlükəyə qarşı özünü qorumaq üçün o heyvanı öldürə bilər. Ancaq əgər bir heyvan insana zərər vermirsə və sadəcə olaraq: “Bu heyvan zərərli heyvandır”, – deyib onu öldürmək olmaz; bu, günahdır.